و كان ســـراب
محصلش ما بينًا اي عتاب
مع اننا في يــوم كنًا قُراب
بس كل دة كان ليكي
لما فكرت في يوم اشفيكي
و افك الشرايط البيضا من ضفايرك
هحوط مكانهم وردة
و لو ماتت .. جفيفيها , و ارميها علي قبري لما اموت
كان ســـراب
لما أمك قالتلي انك لسة بتلوني
قلنا انك عمرك ما حتكبري و تتجوزي
و اشوفك أم ..شايلة ابنك , بدل عرايسك
كان ســـراب
لما شفتك قدامي بتتغيري
و بفستانك الابيض بتتصوري
كنتي منقرشاه بالالوان .. علشان تفكريني بأيام زمـــان
لما كنتي بتجري عليا .. و انا جايبلك علبة الوان جديدة
يــــااه .. كبرتي قوي
و عريسك جمبك .. و انتي وياه بتضحكي
انا و امك نفسنا نتصور معاكي
سامحيني يا بنتي .. مش قادر اوصلك
الناس حواليكي كتيـــر .. لابسين اســـود
و عماليــن يعيــــطوا
الناس حواليكي كتيـــر .. لابسين اســـود
و عماليــن يعيــــطوا
بس انا متأكد ان دي دموع فرحة
كـــان ســـراب
حيــاتك كلهــا كانت ســراب
كانت بالنسبالي محض عـــذاب
برسم حياتك بألوانـــك
و انتي طيفك حواليا .. بيحسسني بحنانـــك
الوردة المجففة اللي زينت شعرك .. انا اللي رميتها علي قبرك
خليتيني انا الصغير .. خليتيني انا اللي اتغيــر
و اقعد الون في كتابك .. و اقرب من احبابك
و العب مع عرايسك
تفتكري نكون بدلنا ؟؟
بقيت انا قـــاعد .. و مطـــول
و انتي استعجلتــي .. و مشيتـــي
بقيـــت ســراب
رابط الكام شعر البيض في راسي .. بشريطتــــك البيـــضا
